Татарстанда яңа Haier заводы төзелеше башланды

29 май 2018 ел., сишәмбе

Яр Чаллыда Haier кер юу машиналарын чыгаручы заводка нигез салуның тантаналы церемониясе үтте. Завод Кытай компаниясенең Яр Чаллыда индустриаль паркны төзүдә беренче чираты булып тора.

Церемониядә Haier компаниясенең вице-президенты Шу Хай, Татарстанның Икътисад министры Фәрид Абдулганиев, Казандагы КХР генераль консулы У Инцинь, Яр Чаллы мэры Наиль Магдеев катнаштылар.

Haier кер юу машиналарын җитештерү Татарстанда 2019 елда башлап җибәреләчәк дип планлаштырыла. Икенче чиратта – телевизорларны җитештерү. Өченче чиратта катлаулы техника җитештерүе булачак.

“Без Haier индустриаль паркының төзелешен башлыйбыз. Проектка инвестицияләр күләме 1 млрд доллар тәшкил итә. Бу бик зур проект. Анда 12 завод булачак”, - дип Татарстанның инвестицион үсеш агентлыгы җитәкчесе Талия Миңнуллина белдерде.

Моннан башка бу елда Татарстан тагын бер зур Кытай инвесторын җәлеп итте – буялган корыч җитештерү буенча «Камасталь» заводы Түбән Кама зонасында урнашачак. Монда инвестицияләр 400 млн сум тәшкил итәчәк.

Haier Кытай компаниясенең сәнәгый паркына 125 га җир бирелде. Монда 5 мең эш урыны барлыкка киләчәк.

Фото: Яр Чаллы Башкарма комитетының Мәгълүмати сәясәт идарәсе

ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования