«Яр Чаллы» УКСИҮТта ике яңа резидент булачак
Татарстан Республикасы Премьер-министры Алексей Песошин җитәкләгән «Яр Чаллы» УКСИҮТта урнаштыру буенча комиссия тагын ике заявканы хуплады.
“Коммуналь хуҗалык машиналары” ААҖ УКСИҮТ территориясендә махсус машиналарны җитештерергә ниятләнә: юл-төзелеш һәм коммуналь техника. Инвестицияләрнең күләме 95 млн сум тәшкил итәчәк, 48 эш урыны булдырылачак.
Узган елда илдә юл-төзелеш техникасы базары якынча 200 млрд сум тәшкил итте, монда ватан җитештерүчеләрнең өлеше – 34%. Шулай әлеге техниканы арендага алу хезмәте бик сорап алына – Россиядә әлеге сегментның еллык үсеше 7%ка җитә.
«Термокреп» ААҖ УКСИҮТта термодиффузияле металл капламалы металл әйберләрне җитештерүче завод төзәчәк. Саклаучы катламны ясаган технология детальләрнең яшәү вактын һәм сыйфатын арттыра. Әлеге металл әйберләр төзелеш һәм нефть, газ сәнәгате базарларында сатыла: торбалар, саклаучы тоташмалар, фитинг, фланецлар. Проектка инвестицияләр 130,7 млн сум бәяләнә, 40 эш урыны булдырылачак дип ТР Президенты матбугат хезмәте белдерә.
Искә төшерик, 2 ел эчендә УКСИҮТ барлыкка килү моментыннан шәһәргә 21 резидент килде. Аларның барлык инвестицияләр күләме – 24 млрд сумнан артык, алардан 14,5 млрд сум кертелде. 3 мең эш урыны булдырылды.
Фото чыганагы: Степанов Слава