Татарстан ИХО илләре белән партнерлык мөнәсәбәтләрен үстерә
Татарстан Республикасының инвестицион үсеш агентлыгы җитәкчесе Талия Миңнуллина Истанбулда (Төркия) ИХО дәүләт һәм хосусый инвестицияләр буенча конференциядә чыгыш ясады. Чара ИХО илләренең инвестицион потенциалын бәяләү һәм хезмәттәшлек мөмкинлекләрен киңәйтү максаты белән үткәрелә.
Конференциядә дәүләт башлыклары, инвестицияләр, сәнәгать һәм МСП министрлары, сәүдә палаталары, икътисадый берләшмәләр вәкилләре, эре халыкара компанияләр җитәкчеләре катнашты.
Эчке һәм чит ил инвестицияләре илләр һәм төбәкләрнең тормыш шарты булып кала: икътисад, инфраструктура тармакларын үстерүгә, яңа эш урыннары булдыруга ярдәм итә, нәтиҗәдә – тормыш дәрәҗәсен арттыруга. Конференция дәүләт һәм хосусый секторларда тотрыклы партнерлык мөнәсәбәтләре булдыру өчен мәйданчык булды.
«Ислам хезмәттәшлеге оешмасына күпьеллык хезмәттәшлек өчен рәхмәт белдерәм! Без ИХО илләренең партнерларыбыз белән актив эшлибез. 2020 елның июнендә без Казанда 12нче тапкыр рәттән «Россия-Ислам дөньясы: KazanSummit» халыкара икътисадый саммитын уздырачакбыз. Узган ел анда дөньяның 72 иленнән, Россиянең 38 төбәгеннән 5000 кеше катнашты, саммит кысаларында хезмәттәшлек турында 42 килешү төзелде. ИХО илләре хөкүмәте әгъзалары белән бергә мин үткәргән инвестицион сессия ачык диалог булдыруга һәм тәҗрибә алмашуга ярдәм итте», – дип Талия Миңнуллина билгеләде.
Төркия Республикасы Президенты Рәҗәп Тайип Эрдоган ассызыклаганча, мөселман илләре табигый һәм кеше ресурсларына карата шактый зур потенциалга ия, шулай ук дөнья сәүдә юлларында урнашкан, һәм хезмәттәшлекнең нәтиҗәле механизмын тәэмин итү зарурлыгына аерым басым ясады.
«Бу конференциядә чыгыш ясау минем өчен зур дәрәҗә. Төркия Хөкүмәтенә аерым рәхмәт белдерәм. Төркия – безнең стратегик партнерыбыз, әйдәп баручы инвестор. «Кастамону Энтегре», «Хаят Кимья», «Шишеджам», «Джошкуноз», «Колуман» кебек компанияләр Татарстанда үз проектларын уңышлы гамәлгә ашыралар, бу безнең регионның инвестицион шартларын һәм мөмкинлекләрен иң яхшы бәяләү булып тора.
Татарстан бишенче ел рәттән Россия төбәкләрендә инвестицион климат торышының Милли рейтингы лидерлары өчлегенә керә. Безнең илдә Федераль салым ташламалары булган территорияләр күп: 2 махсус икътисади зона һәм 5 социаль-икътисади үсештән алданрак булган территория бар. Планнарда тагын бер МИЗ – Әлмәт, Лениногорск һәм Түбән Кама районнарында «АлмА» булдыру, шулай ук киләсе елда Индустриаль парклар санын 100гә җиткерү», – дип Талия Илгизовна белдерде.
Конференция кысаларында ТР ИҮА башлыгы төрле өлкәләрнең топ-менеджерлары, шулай ук Анатолий львов Askon эшмәкәрләр ассоциациясенең генераль директоры урынбасары, яңа инвестицияләр һәм бизнес үсеше комитеты рәисе Мостафа Мертҗан, Pagev ассоциациясе идарәсе рәисе Явуз Эроглу белән хезмәттәшлек турында сөйләшүләр үткәрде. Pagevка 1 750 компания керә, аларга Төркия пластмассалары җитештерүнең 88% тан артыгы туры килә. Әлеге ассоциацияләр әгъзалары өчен бизнес-миссияләр оештыру турында килешенде.