8 проект Татарстан Республикасының Инвестицион советы тарафыннан хупланды
Бүген Татарстан Республикасы Президенты Рөстәм Миңнеханов рәислегендә Татарстан Республикасы Инвестицион советы утырышы узды. Чара видеоконференция режимында узды.
«Без очрашкан чакыруларга карамастан, инвестицияләр җәлеп итү һәм республикада яңа проектларны гамәлгә ашыру өстенлекле бурычларның берсе булып тора», – дип ассызыклады Рөстәм Нургали улы.
Инвестицион совет тарафыннан 8 инвестицион проект каралды, шуларның 2сен дәүләт-хосусый партнерлык механизмнарын кулланып тормышка ашыру планлаштырыла.
Шулай итеп, «Техно Про» ҖЧҖ генераль директоры Айдар Нигъмәтуллин авыл хуҗалыгы махсуслаштырылган техника, шулай ук сәламәтлек мөмкинлекләре чикләнгән кешеләр өчен махсус техника җитештерү проектын тәкъдим итте.
«Махсус техниканы мөмкинлекләре чикләнгән кешеләр таләпләренә яраклаштыру мөмкинлеге – бизнес күзлегеннән түгел, ә социаль юнәлештә мөһим элемент. Без җитештерә торган җайлаштырылган техника әлеге категория гражданнарда зур кызыксыну белән файдалана. Безнең техника үз участогыннан читкә чыгарга гына түгел, аларга элек физик чикләүләр аркасында билгеле булмаган эшләрне башкарырга да мөмкинлек бирә», – дип хәбәр итте Айдар Нигъмәтуллин.
Моннан тыш, компания юл хезмәтләре, бакчачылык ширкәтләре һәм яшел территорияләргә хезмәт күрсәтү өчен билгеләнгән профессиональ радиоидарәле чапкыч чыгарырга планлаштыра.
Өстәмә юнәлеш буларак реабилитацион җиһазларын ремонтлау буенча сервис үзәге ачу, шулай ук мөмкинлекләре чикләнгән кешеләрне махсус техника җитештерүгә җәлеп итү планлаштырыла.
Регионнарны газлаштыру программаларын гамәлгә ашыруда ярдәм итү максатларында ярымприцеплар-сыекландырылган табигый газны саклау, ташу һәм җайга салу өчен цистерналар әзерләү проекты турында «Колуман Рус» ҖЧҖ башкарма директоры Али Йалчын сөйләде. Проект кысаларында сыекландырылган табигый газ өчен криоген цистерналар, шулай ук автозаправка станцияләре һәм газлаштыру станцияләре өчен сыекландырылган табигый газның стационар/зур габаритлы криоген цистерналары әзерләү планлаштырыла.
Киләсе проект үсемлек полимерлары җитештерү буенча биозавод төзүгә багышланган. Яңа производствоны урнаштыру мәйданчыгы сыйфатында Буа һәм Чүпрәле районнары карала. Проект кысаларында 170 яңа эш урыны булдыру планлаштырыла. Инвестицияләрнең гомуми күләме – 1 млрд. сумнан артык.
Аннары катнашучылар ДХП механизмнарын кулланып гамәлгә ашыруга тәкъдим ителгән проектлар турында фикер алыштылар. «Чебиләр» коррекция үзәге директоры Руфина Адильҗанова заманча прогрессив методикалар кулланып, аутистик спектрдагы (РАС) балалар өчен реабилитацион үзәкне төзү проектын тәкъдим итте. Балалар 1 яшьтән алып 3 яшькә кадәр реабилитацияне уза башласалар, алар шәхесне тулы канлы формалаштыруга, интеллектны үстерүгә, социаль-көнкүреш һәм коммуникатив күнекмәләрне үстерүгә бөтен мөмкинлекләре бар, ә киләчәктә үзләре өчен кызыклы өлкәдә эш таба алачаклар.
«Глэмпинг-проектлар» ҖЧҖ директоры урынбасары Алексей Романов Биектау районы территориясендә глэмпинг-комплекс төзү проектын тәкъдим итте. Глэмпинг – ул кемпингның табигатьтә ял итү мөмкинлеге булган кунакханә номерының уңайлылыгын берләштерә торган төре. Россиядә бүген 60 тан артык глэмпинг эшли. Биектау районы территориясендә уңайлы йортлар урнаштыру, шулай ук кирәкле сервис булдыру планлаштырыла: ресторан, мунча, спа-комплекс, бассейн, спорт зал һ. б.
Шулай ук Инвестицион совет тарафыннан «Яшел Үзән» сәнәгать мәйданчыгы, Татарстан Республикасы территориясендә газ-мотор ягулыгы базары һәм газ заправкасы инфраструктурасы үсеше өчен, шулай ук Яр Чаллы шәһәрендә спорт-сәламәтләндерү комплексы төзү өчен җир кишәрлекләре бирелде.
«Бүген, Татарстан Республикасының 2030 елга кадәр социаль-икътисадый үсеш стратегиясенә таянып, без социаль-әһәмиятле проектларга тормыш бирәбез, алар, беренче чиратта, балаларга ярдәм итәчәк һәм сәламәтлекләре буенча мөмкинлекләре чикләнгән кешеләр тормышын уңайлы һәм тулы канлы итәчәк. Моннан тыш, без экологик производствога ярдәм итәбез, Татарстанның инвестицион инфраструктурасын, СПГ һәм газ-мотор ягулыгы базарын, экотуризмны үстерәбез һәм гражданнарыбыз өчен спортны кулай итәбез.
Пандемия чорында без партнерларыбызны инвестицион проектлар буенча эшне туктатмауларын һәм дистанцион форматта безнең белән барлык техник мәсьәләләрне тикшерүләрен сорыйбыз», – дип Татарстан Республикасының инвестицион үсеш агентлыгы җитәкчесе Талия Миңнуллина уртаклашты.