ТР Инвестиция советы тарафыннан гомуми инвестицияләр күләме 6,5 млрд сум булган 9 яңа инвестпроект хупланды
Регион территориясендә гамәлгә ашыру өчен Татарстан Республикасының Инвестиция советы тарафыннан гомуми инвестицияләр күләме 6,5 млрд сум булган 9 яңа инвестпроект хупланды:
- Питрәч районында ультрапастерацияләнгән коры сөт һәм сыр продукциясе җитештерү;
- транспорт чаралары белән идарә итү өчен цифрлы системаларның компонентлары һәм интеллектуаль телематик чишелешләр җитештерүне оештыру;
- суыткыч техникасы җитештерү буенча завод төзелеше;
- Казан шәһәренең Совет районында бассейнлы физкультура-сәламәтләндерү комплексы төзелеше, проект дәүләт-хосусый партнерлык механизмнарын кулланып тормышка ашырылачак;
- Казан шәһәренең 33 нче Хәрби шәһәрчек территориясендә торак йортлар комплексы төзелеше;
- Чаллыда «ЭКСПО-КАМА» Күргәзмә үзәге төзелеше һ. б.
Татарстан Президенты Рөстәм Миңнеханов инвесторларга проектлары өчен рәхмәт белдерде һәм һәр производствоның билгеләнгән вакытта эшләтеп җибәреләчәгенә ышаныч белдерде.
Гамәлгә ашыру өчен 1000 яңа эш урыны булдырылачак.
Утырышта Татарстан Республикасының инвестицион үсеш агентлыгы җитәкчесе Талия Миңнуллина дөньяда һәм Татарстанда урнашкан инвестицион хәле, шәхси компанияләрне финанс яктан савыктыру өчен төрле илләр тарафыннан күрелә торган чаралар, шулай ук инвестицион эшчәнлек үсешен стимуллаштыра торган Татарстан чаралар турында белдерде; Россия Федерациясе субъектларына дәүләт бурычларын исәпкә алырга мөмкинлек бирә торган федераль законнардагы яңалыклар һәм механизмнар турында сөйләде.
«2020 елның 6 ае эчендә дөньякүләм инвестицион агымнар 49% ка кимегән. Россиядә чит ил инвестицияләре агымы ярты елда – 90% ка, Татарстанда 78,8% ка кимегән. Бюджеттан тыш чыганаклардан төп капиталга инвестицияләр 2020 елның 6 аенда узган елның шул ук чоры белән чагыштырганда 12,5% ка кимегән һәм 198 млрд сум тәшкил иткән.
Инвестиция эшчәнлеген законнар дәрәҗәсендә стимуллаштыру өчен кайбер чаралар кабул ителде. Россия Федерациясе Хөкүмәтенең 2020 елның 19 октябрендәге карары белән яңа инвестицион проектларны билгеләү тәртибе билгеләнгән, аларны гамәлгә ашыру максатларында төбәк бюджеты акчалары Россия алдында бюджет кредитлары буенча бурычларны түләү күләмен киметү нәтиҗәсендә азат ителә, төбәк тарафыннан инфраструктура объектларына бюджет инвестицияләрен гамәлгә ашыруга юнәлдерелергә тиеш. Сүз авыл хуҗалыгы, файдалы казылмалар чыгару һәм эшкәртү производстволары кебек транспорт, энергетика һәм коммуналь инфраструктура объектларын төзү яки реконструкцияләү турында бара. Россия субъектларының перспективалы икътисадый специализацияләренә караган тармаклар буенча, инфраструктура объектларына бюджет инвестицияләре дәүләт (муниципаль) милек объектларына капитал салулар рәвешендә, акцияләренең 100% Россия субъектына карый торган юридик затларга субсидияләр рәвешендә, күрсәтелгән юридик затлар милкендәге капиталь төзелеш объектларына капитал салуларны гамәлгә ашыруга һәм алар тарафыннан күчемсез мөлкәт объектларын сатып алуга, алга таба мондый юридик затларның устав капиталларын арттыруга, шулай ук юридик затларга субсидияләр рәвешендә гамәлгә ашырылырга мөмкин. Безгә хәзер Татарстан Республикасыннан шундый проектлар исемлеген формалаштырырга кирәк.
Бүген инвестпроектларны гамәлгә ашыру өчен максималь ярдәм күрсәтү аеруча мөһим. Шуңа бәйле рәвештә, республиканың Төзелеш министрлыгы белән берлектә, Без «Татарстан инвестицияләрен контрольдә тоту» системасын эшләтеп җибәрдек. Агентлык һәм инвестор арасында инвестицион килешү төзелә, Татарстан буенча җаваплы кешеләр белән юл картасы эшләнә һәм агентлыктан куратор беркетелә һәм йөкләмәләрнең үтәлешен күзәтеп тора», – дип билгеләде Талия Миңнуллина.
ТР ИҮА башлыгы, шулай ук, Инвестиция совет әгъзаларына проектларны алдан карау һәм ведомствоара килештерү өчен, эш төркеме регламентын расларга тәкъдим итте, дәүләт-хосусый партнерлыкның ролен көчәйтүгә игътибар итте.
Талия Миңнуллина хәбәр иткәнчә, агымдагы елда бу – Инвестиция советының соңгы утырышы түгел: якынча 16 декабрьдә яңа инвестицион проектлар каралачак.
Моннан тыш, киләсе айда Татарстанның инвесторлар клубының йомгаклау утырышы булачак. Чара Татарстан Иҗтимагый палатасы катнашында узачак, хәйриячелек белән бәйле мәсьәләләр күтәреләчәк.