Татарстан Республикасының инвестицион дайджесты: Әлки районы белән «инвестицион сәгать»
Татарстан Республикасы Әлки муниципаль районы Татарстан Республикасы Башлыгы Рөстәм Миңнеханов рәислегендә узган республика киңәшмәсе кысаларында тотрыклы социаль-икътисадый үсеш тәэмин итү чараларын гамәлгә ашыру турында сөйләде.
Мондый киңәшмәләр республика Хөкүмәте Йортында атна саен уза һәм агымдагы елда 17 февральдән башланды. Район башлыгы докладында район эшчәнлегенең төп күрсәткечләре, тармакларның үсеше, эшмәкәрлекнең торышы, хезмәт хаклары һәм эшсезлек дәрәҗәсе, социаль инфраструктура һәм торак төзелеше темплары, мәгариф, төрле өлкәләрдәге казанышлар карала.
Әлки районы башлыгы Александр Никошин район эшчәнлегенең төп күрсәткече булып тулай территориаль продукт күләме тора, ул 2022 елда 8,3 млрд сум тәшкил итте, агымдагы елга бурыч – үсеш темпын 7% ка арттыру һәм күрсәткечне 8,9 млрд сумга җиткерү дип белдерде.
Районның тотрыклы үсешенә, нигездә, авыл хуҗалыгы өлкәсендә инвестицион проектларны тормышка ашыру ярдәм итә. 2022 елда инвестицияләр күләме 1 млрд 511 млн сум тәшкил итәчәк. Агымдагы ел планы - 1,6 млрд сумнан да ким түгел.
Районда иң эре инвесторларның берсе - «Хузангай» җаваплылыгы чикләнгән җәмгыяте. 2022 елда сөт-товар фермасы төзелде һәм файдалануга тапшырылды. Бүген фермада 1224 нәсел танасы бар. Инвестицияләрнең гомуми күләме - 480 млн сум.
Шулай ук узган елның июнендә "Хузангай" орлов токымлы 68 ат асрала торган ферма төзеп бетерде. Инвестицияләр күләме 30 млн сум тәшкил итте.
Иске Чаллы авылында таналар үстерү буенча "Красный Восток-Агро" акционерлык җәмгыятенең "Чаллы" терлекчелек комплексы реконструкцияләнде. Комплекста 1200 бозау бар. Агымдагы елда болар барысы да районны таналарның үз баш санын тәэмин итәргә мөмкинлек бирәчәк. Кертелгән инвестицияләр күләме 21 млн сум тәшкил итте.
Түбән Әлки авылында «Милк ТК» җаваплылыгы чикләнгән җәмгыяте тарафыннан сөт эшкәртү цехы төзелә. Инвестицияләр күләме 40 млн сум тәшкил итте. Агымдагы елда атланмай һәм каймак җитештерү цехлары эшләтеп җибәреләчәк.
Быел "Хузангай" предприятиесе куертылган сөт җитештерү цехын эшләтеп җибәрергә планлаштыра. Бина төзелде, җиһазлар сатып алынды һәм урнаштырылды, кадрлар сайлап алынды. Инвестицияләрнең гомуми суммасы 100 млн сум тәшкил итәчәк.
“Әлки” кулланучылар кооперативы авыл хуҗалыгы продукциясе әзерләү белән шөгыльләнә, ләкин аның саклау базасы юк. Тотрыклы эшләү өчен, предприятие быел 400 тонна яшелчә саклау урыны төзергә планлаштыра. Инвестиция кертемнәренең гомуми суммасы 63 млн сумнан артык тәшкил итәчәк.
Җитештерелә торган продукция ассортиментын киңәйтү һәм халык өчен хезмәт күрсәтү төрен арттыру максатыннан, Каргополь авылындагы ит цехы базасында кооператив цех эшләтеп җибәрергә планлаштыра, җитештерү куәте — аена 30 тонна әзер продукция. Кертемнәрнең бәясе 35 млн сум тәшкил итәчәк.
Инвестор Казанков Иван Иванович ярдәме белән "Хузангай" ҖЧҖ территориясендә архитектура-этнография туристик комплексы төзелә. Инвестор 1,1 млрд сум акча керткән (ныгытма корылмасы, мәйдан төзелеше). Агымдагы елда әлеге проектны Татарстан Республикасының Инвестиция советында карау планлаштырыла.