Милли икътисад бренды буларак гаилә бизнесы
2024 ел Россия Президенты Владимир Путин тарафыннан Гаилә елы дип игълан ителде. Гаилә бизнеслары еш кына икътисадның нигезе булып хезмәт итә, эш урыннары булдыруга, салым керемнәренә һәм гомуми тулаем продуктка зур өлеш кертә. Алар буыннан-буынга тапшырыла торган мәдәни һәм икътисадый мирас булып торалар, бу исә традицияләрне саклап калуга ярдәм итә һәм инновацияләрне стимуллаштыра. Гаилә бизнесларына ярдәм итү һәм аларны үстерү илнең икътисадый потенциалын үстерүгә, бизнесның социаль җаваплылыгын ныгытуга һәм тотрыклы икътисадый система булдыруга ярдәм итә. Сессия эчке һәм тышкы базарлар өчен теләсә кайсы милли икътисадның төп брендларының берсе буларак гаилә эшкуарлыгын үстерүнең халыкара гамәли тәҗрибәсе, икътисадның әлеге секторын үстерүнең гамәлдәге проблемалары һәм чакырулары, дәүләт ярдәме инструментлары һәм механизмнары турында фикер алышуга багышланган иде.
РФ ССП Вице-президенты Елена Дыбова Россиядә гаилә бизнесы санының процент күрсәткечләре белән уртаклашты: «Безнең компанияләрнең яртысыннан артыгы – беренче буын гаилә бизнесы. Компанияләрнең 37 % – ике буын бизнесы. Шәхси мәктәпләрнең һәм балалар бакчаларының 95 %, хезмәт күрсәтү белән шөгыльләнүче компанияләрнең 85 %, кунакханәләрнең 80 % – болар барысы да гаилә бизнесы. Бу сан арта. Шәхси медицина клиникаларының өчтән ике өлеше диярлек бу шулай ук гаилә бизнесы. Һәр икенче икмәк пешерү шулай ук гаилә бизнесы булып тора».
Федерация Советы Рәисе урынбасары Инна Святенко видеомөрәҗәгатендә гаилә бизнесы башлану формалары турында сөйләде: "Хәзерге этапта дәүләт гаилә бизнесы династияләрен торгызу өчен барлык шартларны да тудыра. Бизнесның, шул исәптән гаилә бизнесының старт алу өчен формаларының берсе -социаль контракт. 2023 елда гына да үз эшен ачу һәм үстерүгә 95 мең социаль контракт төзелгән. Бүгенге көндә кече һәм урта бизнесның 74 % - гаилә предприятиеләре, аларда ир белән хатын һәм туганнары эшли. Шул ук вакытта аларның яртысыннан артыгы 500 млн сумга кадәр әйләнешкә ия. 55 % - беренче буын гаилә предприятиеләре. Эксперт бәяләүләре буенча безнең илдә фермер продукциясенең 99 % гаилә хуҗалыкларында җитештерелгән".
Берләшкән Гарәп Әмирлекләренең икътисад министры урынбасары Абдулла Әл Салех дәүләтнең гаилә бизнесын закон ярдәмендә яклауда катнашу мөһимлеге темасына кагылды. Аның сүзләренчә, дәүләт гаилә компанияләренә ярдәм итәргә тиеш. Дөрес закон чыгару системасы төзелергә тиеш. Гаилә бизнесына ярдәм итү механизмын булдыру мөһим.
Koumala Transport Logistics гаилә логистик компаниясе директоры һәм милекчесе Кума Али гаилә бизнесының компанияне үстерү мөмкинлеге булуы турында сөйләде: «Гаилә бизнесы территориясен киңәйтү бик мөһим. Безнең компания, хәтта халыкара бизнес алып барып та, илебез традицияләрен саклый».
«Инженер-җитештерү үзәге» ҖЧҖ директоры Ольга Айдуганова гаилә бизнесының варислары очраткан проблемалар белән уртаклашты: «Без җавап эзләгән сораулар да бар. Балаларның бизнесны мирас итеп алырга теләве - һәрвакытта да аңлаешлы булмаган мирас алу процедурасы, физик затларга күчергәндә банк комиссияләренең зур күләме, дивидендлар түләгәндә банк комиссияләренең зур күләме, мирас фондлары булдыру шартлары, ярдәм һәм кредитлау чаралары алу, эшчәнлекнең берничә төре булганда билгеле бер хәвеф-хәтәр факторлары бар».
«Хыял» ҖЧҖ оештыручылары Ольга һәм Владимир Попеновлар гаилә бизнесын алып баруда үзара аңлашуның мөһимлеге турында сөйләделәр: «Без тәүлегенә 24 сәгать бергә. Бу күпләрне гаҗәпләндерде, ләкин бу безгә ярдәм итте дә. Без - балаларыбызга яхшы үрнәк. Гаилә бизнесы - ул бизнес алып баруның башка культурасы. Иртән үк гаиләң белән уянасың. Оныкларыбыз безнең белән форумнарга йөри. Алга таба алар да безнең эшне дәвам итәргә телиләр».
«Россия – Ислам дөньясы: KazanForum 2024» XV халыкара икътисадый форумы Казанда 14-19 май көннәрендә уза. Быел аның төп темасы «Ышаныч һәм хезмәттәшлек». Форумның төп максаты - Россия Федерациясе регионнарының һәм Ислам Хезмәттәшлеге Оешмасы илләренең сәүдә-икътисадый, фәнни-техник, социаль һәм мәдәни элемтәләрен ныгыту, шулай ук Россия Федерациясендә ислам финанс системасы институтларын үстерүгә ярдәм итү.