Казанда 2025 елда Татарстанның иң яхшы инвесторларын бүләкләячәкләр
19 декабрьдә Татарстан Республикасының инвестицион үсеш агентлыгы Инвесторлар клубы - бизнес вәкилләренең эшлекле берләшмәсе утырышын үткәрә. Очрашу барышында 2025 елга йомгак ясалачак, шулай ук киләсе елга республиканың инвестицион проектларын үстерү стратегиясе буенча фикер алышу узачак.
Чарада катнашучылар Татарстан Республикасы проектларын һәм предприятиеләрен үстерү буенча үз идеяләрен һәм концепцияләрен тәкъдим итәчәкләр һәм республикада эшлекле климатны камилләштерү юллары турында фикер алышачаклар. Чара кысаларында шулай ук «Инвестицион эшчәнлек буенча Татарстан Республикасының иң яхшы муниципаль берәмлеге», «Татарстан Республикасында инвестицион өлкәне яктырту буенча иң яхшы ММЧ» һәм «Татарстан Республикасында ел инвесторы» номинацияләрен үз эченә алган «Ел инвесторы» конкурсы финалистларын интеллектуаль уен һәм тантаналы бүләкләү узачак.
"Татарстан инвесторлар өчен һәрвакыт ышанычлы партнер булды һәм булып кала, ә клуб әгъзалары һәрьяклап ярдәм ала. Шул исәптән республика җитәкчелеге һәм профильле министрлыклар белән рәсми булмаган утырышларда катнашу мөмкинлеге дә бар, алар вакытында реаль кейслар һәм инвесторларны борчыган мәсьәләләр буенча конструктив фикер алышу бара. Хакимият белән турыдан-туры диалог - Татарстанда инвестицион климатны реаль вакыт режимында яхшыртырга һәм аны максималь җәлеп итүчән итәргә мөмкинлек бирә торган моңарчы күрелмәгән практика», - диде ТР Инвестицион үсеш агентлыгы җитәкчесе Талия Миңнуллина.
Инвесторлар клубы утырышы 2025 елның 19 декабрендә Noble Millenium Panorama 5* кунакханәсенең «Сапфир» конференц-залында узачак. Чара 14:30 да башлана. ММЧ өчен теркәлү 2025 елның 16 декабренә кадәр ачык һәм түбәндәге сылтама буенча мөмкин: ММЧны инвесторлар клубына аккредитацияләү 2025.
"Киңәшмә органын – "Татарстан Республикасы Инвесторлар клубы" Татарстан Республикасының инвестицион үсеш агентлыгы каршындагы Тышкы инвесторлар советын төзү турында" боерыкка 2014 елның 14 февралендә кул куелды. Инвесторлар клубы регионда инвестицион бергәлек формалаштыруга ярдәм итә һәм оеша башлаганнан бирле тәҗрибә уртаклашу һәм региональ хакимият органнары һәм муниципалитетлар администрацияләре белән рәсми булмаган аралашу өчен платформа булып тора.