Татарстан Республикасының инвестицион үсеш агентлыгының Җәмгыяви киңәшмәсе: ел эшенең нәтиҗәләре
Җәмгыяви киңәшмәнең темалары 2013 елда Татарстан Республикасының инвестицион үсеш агентлыгының (ТР ИҮА) нәтиҗәләре, Татарстан Республикасының үсеш һәм экспорт корпорацияләре һәм ИПД «Алабуга» эшчәнлеге, шулай ук ТР ИҮА 2014 елга куелган максатлар булып торды.
Утырыш Агентлык җитәкчесе Линар Якупов һәм аның беренче урынбасары Роберт Галиуллин катнашуы белән үтте. Очрашуда, шулай ук, «Яшьләрнең казанышлары» проектының башлыгы Ляля Бикчентаева, Татарстан Республикасының кече һәм урта бизнес ассоциациясе рәисе Хайдар Халиуллин, Татарстан Республикасының Җәмгыяви пулаты вәкиле Тимур Халиков һәм Татарстан Республикасының үсеш корпорациясе Генераль директоры Булат Гаянов катнаштылар.
Агентлыкның ел нәтиҗәләре турында сөйләгәндә, Роберт Галиуллин катнашучыларга, 2012 елгы күрсәткечләре турында белдереп, 2013 елда туры чит ил инвестицияләре күләме буенча мәгълүматын тәкъдим итте. Ул, шулай ук, 2014-2015 елга Агентлыкның булган максатлары турында белдерде. Мәсәлән, 2014 елда әлеге сан бер кешегә 750 доллар, ә 2015 елда – 1, 5 мең доллар тәшкил итергә тиеш. Бу максат бик мөһим булып тора.
Линар Якупов Татарстан Республикасының инвестицион потенциалын алга таба җәлеп итү, инвесторлар белән эш итү тәҗрибәсен билгеләде. Агентлыкның тәҗрибәсе белән башка Россия регионнары кызыксына һәм алардан тәҗрибә һәм мәгълүмат белән уртаклашу сораулары килә дип белдерелде. Ул, шулай ук, «Invest in Russia» программасы һәм федераль дәрәҗәдә Инвестицияләрне җәлеп итү агентлыгын булдыру турында белдерде.
«Әлеге сораулар күп төрле Россия һәм халыкара форумнарында дискуссияләр темалары булып торды», - дип Линар Якупов ассызыклады.
ТР ИҮА җитәкчесе сүзләре буенча, инвесторлар регионга керү алдыннан өч-дүрт регионны карыйлар һәм алар өчен инфраструктура булуы, регион башлыгының мөнәсәбәте һәм башкалар мөһим.
«Инвесторлар белән сөйләшүләр алты айдан бер елга кадәр бара һәм аны аңларга кирәк, - дип Линар Якупов ассызыклады. – 2012 елда башланган проектлар 2014 елда тәмамланырга тиеш».
Очрашуда, шулай ук, Татарстан Республикасының инвестицион үсеш агентлыгының Россиядә һәм чит илләрдә урнашкан Татарстан, Россия Федерациясе вәкиллекләре һәм илчелекләре, чит ил бизнес ассоциацияләре белән эше билгеләнде. Татарстан Республикасының инвестицион үсеш агентлыгы оештырган Татарстанның приоритетлы үсеш юнәлешләре буенча инвестицион семинарлар нәтиҗәсе тәкъдим ителде.
Айрат Назмеев Татарстан Республикасының экспорт корпорациясе эшчәнлегенең нәтиҗәләре турында сөйләде. Алар арасында Росэксимбанк белән килешү, экспортны финанслау сораулары һәм хөкүмәтара комиссияләрдә, республика эшмәкәрлекләренең чит илләрдә күргәзмә эшчәнлегендә катнашу сораулары каралды. Экспорт корпорациясе катнашуы белән бергә Мәскәүдә Татарстанның медицина кластеры буенча семинар узды. Регионның медицина кластеры белән бергә Татарстан Республикасының экспорт корпорациясе республиканың медицина продукциясен чит илләргә алга таба җәлеп итү сорауларын карады. Хәзер регионның төзелеш өлкәсе вәкилләре белән очрашуны оештыру планлаштырыла.
Татарстан Республикасының үсеш корпорациясе Генераль директоры «СМАРТ Сити Казан» халыкара инвестицион технополисы проектын тормышка ашыру буенча нәтиҗәләрен тәкъдим итте. Проект кысаларында 1 млрд. доллар күләме булган беренче инвестицион килешүләренә кул куелу һәм «СМАРТ Сити Казан» технополисы төзелешенә таш кую церемониясе үтүе дип билгеләнде.
«СМАРТ Сити Казан» 220 инвестицион проекттан тәшкил итә һәм Татарстан Республикасының башкаласы белән бәйләнгән», - дип Линар Якупов белдерде.
«Алабуга» икътисади мәйданы территориясендә инвестицион программалар дирекциясе» (ИПД) директоры Эрик Хабибуллин ИПД «Алабуганың» биш яңа инвестицион проектлары турында сөйләде.
2014 елга планнары турында сөйләгәндә, Роберт Галиуллин Татарстан Республикасының инвестицион үсеш агентлыгы җитештерүне локализацияләү юнәлешендә эшен дәвам итү турында белдерде. Мәсәлән, чит ил машина компанияләре Татарстан базарына чыгу һәм «КАМАЗ», «Ford Sollers» кебек компанияләр белән хезмәттәшлек итүдә кызыксынган.
Татарстан Республикасының инвестицион үсеш агентлыгы регионның приоритетлы үсеш юнәлешләре буенча семинарларны үткәрүен дәвам итәчәк. 2014 елда семинарлар Мәскәүдә һәм чит ил шәһәрләрендә үтәчәк. Планда – «Invest in Tatarstan» кампаниясен үткәрү. Аның кысаларында «СМАРТ Сити Казан» проектының беренче объекты төзелешенә таш кую церемониясе үтүе планлаштырыла.
ТР Инвестицион үсеш агентлыгының матбугат хезмәте