Яшьләр хөкүмәте: «Татарстан — мөмкинлекләр территориясе»
27-29 май көннәрендә Мәскәүдә «Проводники ГосСтарт» программасы кысаларында Бөтенроссия яшьләр үзидарәсе конгрессы узды, ул бөтен Россиядән яшьләр хөкүмәтләре, парламентлар һәм иҗтимагый оешмалар вәкилләрен берләштерде. Конгресс кысаларында Татарстан Республикасы Яшьләр хөкүмәтенең инвестицион үсеш мәсьәләләре буенча киңәшчесе Элеонора Йосыпова «Татарстан — мөмкинлекләр территориясе» дигән доклад белән чыгыш ясады.
Чыгыш барышында Россиянең инвестицион җәлеп итүчән алдынгы төбәкләренең берсе буларак Татарстан Республикасының төп өстенлекләре күрсәтелде. Алга киткән сәнәгать һәм транспорт инфраструктурасына, махсус икътисадый зоналарга, алгарышлы үсеш территорияләренә, шулай ук республиканың инвесторларга, эшмәкәрләргә һәм яшь белгечләргә бирә торган мөмкинлекләренә аерым игътибар бирелде. Яшьләрнең төбәкнең социаль-икътисадый үсешендә катнашуы докладның аерым темасы булды. Элеонора Татарстан Республикасы Яшьләр хөкүмәте эшчәнлеге һәм Татарстан Республикасының инвестицион үсеш агентлыгы белән хезмәттәшлек турында сөйләде, республика яшьләренең бүген иҗтимагый көн тәртибенә кертелеп кенә калмыйча, инвестицион проектлар турында фикер алышуда, инициативалар эшләүдә һәм төбәкнең инвестицион климатын үстерүдә катнашуын билгеләп үтте.
Шулай ук конгресста катнашучыларга яшьләр, дәүләт хакимияте органнары һәм үсеш институтлары арасында нәтиҗәле хезмәттәшлек урнаштыру буенча Татарстан тәҗрибәсе тәкъдим ителде, бу яшьләргә гамәли тәҗрибә алырга һәм төбәк өчен әһәмиятле карарлар кабул итүдә катнашырга мөмкинлек бирә. Мондый федераль мәйданчыкларда катнашу регионнар арасында иң яхшы тәҗрибәләр алмашуга һәм ил үсешендә яшьләр үзидарәсе ролен ныгытуга ярдәм итә.