КДЭУда Россия-Кытай яшьләр бизнес-инкубаторы проектын гамәлгә ашыру турында сөйләштеләр

Казан дәүләт энергетик университетта Татарстан-Кытай яшьләр эшмәкәрлеге Көннәре программасы кысаларында Россия-Кытай яшьләр бизнес-инкубаторы проектын гамәлгә ашыру турында сөйләштеләр. Катнашучылар арасында Татарстанның инвестицион үсеш агентлыгы җитәкчесе Талия Миңнуллин, КДЭУ ректоры Эдвард Абдуллазянов, Казандагы Кытай Генераль консуллыгы консулы Ли Фэй, республика министрлыгы һәм идарәләре җитәкчеләре булды.

Спикерлар Татарстан һәм Кытайның хезмәттәшлек юнәлешләре һәм мөмкинлекләре турында сөйләделәр. Талия Миңнуллина Кытайның Агентлыкта булган партнерлар исемлегендә күп юнәлешләр буенча приоритетлы урында булуын билгеләде.

«Шундый хезмәттәшлек илләребезнең үсешенә яхшы тәэсир итә. Узган елда Кытай Татарстанның беренче биш инвесторлар исемлегенә кермәде, ә 2018 елда ул исемлектә бар. Бәлки ул лидер да була алачак», – дип Талия Миңнуллина билгеләде.

Консул Ли Фэй 2018-2019 еллар Кытай һәм Россия регионнарының хезмәттәшлек еллары булып игълан итү турында искә төшерде.

«Аралашуны үстерү өчен яхшы мөмкинлек. Университет нигезендә инкубатор – бизнесны башлап җибәрү өчен уңышлы старт. Бүгенге форум хезмәттәшлекне ныгыту буенча бөтен сорауларны карау мәйданы булды», – дип Ли Фэй билгеләде.

Белешмә

Россия-Кытай яшьләр бизнес-инкубаторы КДЭУ нигезендә 2018 елда ачылды. Әзерләү программасы буенча укуны ике яктан 10 кеше үтте. 2019 елда резидентлар саны 30га җитәчәк. Проектта 35 яшькә кадәр эшмәкәрләр катнаша. Әлеге инкубатор – 11 мәйданнарның берсе. Башкалары  Брянск, Барнаул, Кемерово, Комсомольск-на-Амуре, Мәскәү, Ростов-на-Дону, Новосибирск, Омск, Ульяновск һәм Өфәдә бар. Проектта катнашкан кешеләр Яшь эшмәкәрләр Россия-Кытай клубының әгъзалары булачак.