Татарстан-Шаньдун: хезмәттәшлекнең яңа яклары
Казанда «Татарстан-Шаньдун» бизнес-форумы узды, ул хөкүмәт делегациясенең Татарстанга визиты кысаларында Шаньдун провинциясенең эшлекле даирәләре вәкилләренең һәм Шаньдун провинциясенең Халык сәяси консультатив советының Рәисе урынбасары Хань Цзиньфэн җитәкчелегендә узды.
Хань Цзиньфэн әфәнде сәламләү сүзендә билгеләп үткәнчә, Татарстан-Кытайның стратегик партнеры, Татарстан-Кытай мөнәсәбәтләрен үстерү буенча мәйданчыкны оештырган өчен рәхмәт белдерде һәм аның илләр дәрәҗәсендә хезмәттәшлекне ныгыту өчен әһәмиятен билгеләп үтте.
«Быел безнең илләр арасындагы мөнәсәбәтләрнең 70 еллыгы билгеләп үтелә. Татарстан Республикасы һәм Кытай Халык Республикасы арасында товар әйләнеше узган елда 10 процентка артты һәм 630 млн доллар тәшкил итте. Әлбәттә, бу безнең ныклы дуслык мөмкинлекләрен чагылдыра торган саннар түгел. Бу юнәлештә эшне көчәйтергә кирәк», – дип үзенең чыгышында Татарстан Республикасының инвестицион үсеш агентлыгы җитәкчесе Талия Миңнуллина билгеләде.
Татарстан Кытай белән актив хезмәттәшлек итә. Республика хөкүмәте ике як өчен дә файдалы хезмәттәшлекне киңәйтү буенча тыгыз эш алып бара. Узган ел гына да Татарстан Президенты җитәкчелегендәге делегация Кытайның 6 провинциясендә һәм бик күп шәһәрләрдә булды. Агымдагы елның июнендә Татарстанның беренче затлары Харбиндагы Россия-Кытай ЭКСПОсында катнашырга һәм параллель рәвештә Татарстан Республикасы икътисады һәм мәдәнияте көннәрен ачарга планлаштыралар.
Татарстан һәм Кытайның хезмәттәшлек буенча гамәлдәге килешүе бар. Кытай провинцияләре белән 6 килешү һәм муниципаль берәмлекләр, шул исәптән Шаньдун провинциясе арасында 14 килешү имзаланды.
Узган ел «Татарстан-Шаньдун» бизнес-форумы сентябрьдә Татарстан делегациясенең Цзинань шәһәренә визиты барышында узды. Моннан тыш, делегация провинциянең берничә эре предприятиесендә һәм Циндао шәһәрендә булды, анда Татарстанның иң эре Кытай партнеры - Haier компаниясенең штаб-фатиры урнашкан.
Бүген Татарстанда, Чаллы шәһәрендә суыткычлар җитештерү буенча Haier заводы уңышлы эшләп килә. 3 ел эчендә заводта ярты миллионнан артык суыткыч җитештерелгән. Хәзерге вакытта Haier индустриаль паркын ачу буенча актив эш алып барыла.
Татарстан предприятиеләре Кытай компанияләре белән, мәсәлән, Huawei белән мәгълүмати–коммуникацион технологияләр өлкәсендә уңышлы хезмәттәшлек итәләр.
Агымдагы елның 12 апрелендә Түбән Кама шәһәрендә «Пионер» индустриаль паркын һәм цинкланган рулонны буяу буенча уртак предприятиене ачу тантанасы булды. Бүгенге көндә 104 эш урыны булдырылган. Чит ил инвестицияләре күләме – 600 млн сум. Проект куәте -елына 100 мең тоннага кадәр. Җитештерү заманча барлык таләпләргә дә җавап бирә, буяу технологик процессны өзлексез контрольдә тотуның яңа системасы белән җиһазландырылган, бу исә продукциянең югары сыйфатын даими рәвештә сакларга мөмкинлек бирә.
«Татарстанда Россиядә иң яхшы инвестицион инфраструктура булдырылган. Бездә 85 индустриаль парк, федераль салым өстенлекләре булган 7 территория бар. Бөтен илдә мондый хәлләр беркемдә дә юк», – дип ассызыклады инвестицион үсеш агентлыгы җитәкчесе һәм перспектив юнәлешләр рәтендә энергетика, химия, металлургия, текстиль, төзелеш һәм азык-төлек сәнәгатен билгеләде.
Талия Миңнуллина билгеләп үткәнчә, Кытай үзенең бай тарихы һәм зирәклеге белән билгеле. «Сәяхәттән элек булган кебек берәү дә кайтмый. Мин сезгә яңа белемнәр, яңа тәҗрибә, дуслар, партнерлар һәм идеяләр белән әйләнеп кайтуыгызны телим», – дип Талия Илгиз кызы теләде.
«Яр Чаллы» УКСИҮТ инвестицион мөмкинлекләрен форум кысаларында «Яр Чаллы» УКСИҮТ Башкарма комитеты җитәкчесе урынбасары Эльдар Тимергалиев тәкъдим итте. Түбән Кама муниципаль районы башкарма комитеты җитәкчесенең беренче урынбасары Радмир Беляев «Түбән Кама» УКСИҮТ базасында бизнес алып баруның өстенлекләре турында сөйләде. «Яшел Үзән» УКСИҮТ резидентлары өчен ачылган мөмкинлекләрне Яшел Үзән районы Башкарма комитеты җитәкчесе урынбасары Зөлфәт Хәбибуллин ачты. “Алабуга” МИЗның инвестицияләр җәлеп итүчәнлеге турында «Кытай» департаменты директоры Евгений Горшков сөйләде. Кытай компанияләренең Татарстан Республикасы машина төзелеше кластеры әгъзалары белән кооперациясен үстерү турында Машина кластеры идарәсе рәисе Сергей Майоров сөйләде.
Бизнес-бергәлекне киңәйтү өчен Шаньдун провинциясенең эшлекле даирәләре вәкилләре үз компанияләренең эшчәнлеген тәкъдир иттеләр.
«Татарстан-Шаньдун» форумы нәтиҗәле хезмәттәшлекнең яңа башы – Кытай-Россия предприятиеләре берлеге һәм машина төзелеше кластеры арасында хезмәттәшлек турында Килешүгә кул кую белән тәмамланды.