Kazan Digital Week-2020 халыкара форумы старт алды
21 сентябрьдә Kazan Digital Week-2020 халыкара форумы – тәҗрибә уртаклашу, шулай ук цифрлы технологияләрне эшләү һәм алга этәрү өчен яңа халыкара мәйданчык.
Форумны ачу тантанасы Татарстан Республикасы Президенты Рөстәм Миңнеханов, Россия Федерациясе Хөкүмәте рәисләре Дмитрий Чернышенко һәм Марат Хөснуллин, Татарстан Республикасының Цифрлы үсеш министры Айрат Хәйруллин, Татарстан Республикасының инвестицион үсеш агентлыгы җитәкчесе Талия Миңнуллина, «Huawei» компаниясенең Евразия регионындагы Президенты Эйден У, «ЭРТИКО ИТС-ЕВРОПА» Ассоциациясе генераль директоры Якоб Бангсгаард, «Сколково» фонды рәисе Аркадий Дворкович һ. б. катнашунда башланды.
Утырыш барышында катнашучылар цифрлы өлкәдә яңа трендлар турында фикер алыштылар. Сколково рейтингы буенча, Татарстан бүген Россия төбәкләре арасында цифрлаштыру буенча икенче урында тора. Татарстан Республикасы Президенты Рөстәм Миңнеханов сүзләренә караганда, цифрлы технологияләрне куллану – ул безнең гражданнарның тормыш сыйфатын һәм бизнесның конкуренциягә сәләтен арттыру мөмкинлеге.
Спикерлар билгеләп үткәнчә, бүген цифрлаштыру барлык тармакларга да кагылды – мәгариф, сәнәгать, сәламәтлек саклау һәм башкалар. Шулай ук «Халык контроле» мәгълүмати системасы булдырылды. Агымдагы елның 1 сентябренә мәктәпләрнең 100% ы югары тизлекле оптик-җепселле челтәрләргә тоташтырылган. Республикада Иннополис университеты – илнең бердәнбер ИТ-югары уку йорты эшли. Агымдагы елда университет дөньяның төрле илләреннән 12 мең гариза кабул итте.
Kazan Digital Week-2020 форумының төп миссиясе – фәнни, техник һәм коммерция даирәләрендә элемтәләрне үстерү һәм ныгыту өчен мәйдан формалаштыру, иң яхшы дөнья һәм Россия цифрлаштыру тәҗрибәсе белән уртаклашу.
Бүген Татарстан инновацион регион булып тора һәм цифрлаштыру буенча Россия төбәкләре медиарейтингының лидерлары өчлегенә керә. Биредә белем бирү, медицина һәм муниципаль хезмәтләрне актив цифрлаштыруга, урта һәм кече бизнеска ярдәм итү өчен мәгълүмати-технологик карарлар эшләүгә юнәлдерелгән проектлар һәм стартаплар тормышка ашырыла. Татарстанда югары технологияләр өлкәсендә «ИТ-парк» технопаркы уңышлы эшләп килә.
Моннан тыш, Татарстанда IT-тармакны үстерүнең төп юнәлешләреннән берсе – предприятиеләрне цифрлы трансформация өчен шартлар һәм мөмкинлекләр булдыру. Агымдагы елның апрелендә Татарстан Республикасының инвестицион үсеш агентлыгы Татарстанның цифрлы үсеше өчен федераль акчаларны җәлеп итү буенча 15 нче эш төркеме утырышында катнашты. Әлеге исемлеккә шулай ук регионның мәгълүмати инфраструктурасын үстерүгә ярдәм итүче чаралар да кертелгән: «Сәнәгатьне цифрлаштыру», «Старт – Цифрлы технологияләр», «Үсеш – Цифрлы технологияләр» һәм башкалар.
Kazan Digital Week-2020 форумы 21-24 сентябрь көннәрендә онлайн режимында уза. Бер виртуаль мәйданчыкта 30 илдән 263 спикер һәм 6 меңнән артык катнашучы катнашачак. Форум кысаларында панель дискуссияләр һәм түгәрәк өстәлләр, күргәзмәләр, техник турлар, нетворкинг-клуб биш төп юнәлеш буенча узачак: интеллектуаль транспорт системалары, ситуацион үзәкләр, яңа вакытның киберкуркынычсызлыгы, финтех экосистемасы, бизнеска интеграцияләнгән инновацияләр.