Татарстанда сөт комплексы төзелешенә 2,2 млрд сум инвестициялиләр
Минзәлә районында 2 400 башка исәпләнгән икенче роботлаштырылган сөт комплексы төзелеше башланды.
Бу этапта завод төзелеше бара, аның төзелеше ике чиратта барачак. Объектның беренче чиратын киләсе елда тәмамлау планлаштырыла, икенчесен — 2023 елда. Комплекс автоматлаштырылган саву системасы белән җиһазландырылачак, ул хайваннарның продуктивлылыгын алар өчен уңайлы яшәү мохите булдыру ярдәмендә сакларга мөмкинлек бирәчәк. Моннан тыш, бүлмәләрдә заманча кросс-вентиляция системасы каралган, ул һәр хайванга саф һава керү мөмкинлеген тәэмин итәчәк.
«Татарстан Республикасы бүген – илдә товар сөт җитештерү буенча лидер. Җитештерүне роботлаштыру һәм автоматлаштыру предприятиенең җитештерү эшчәнлегенең нәтиҗәлелеген арттыруга гына түгел, ә безнең республикада югары технологияле терлекчелекне үстерүгә дә ярдәм итә. Яңа сөт комплексын төзү яңа эш урыннары булдырырга мөмкинлек бирәчәк. Комплекс төзелешенә инвестицияләрнең гомуми күләме 2,2 млрд сум тәшкил итәчәк», – дип ассызыклады Татарстан Республикасының инвестицион үсеш агентлыгы җитәкчесе Талия Миңнуллина.
2019 елда Мөслим районында беренче роботлаштырылган сөт комплексы төзелә башлады. Объектны агымдагы елның III кварталында файдалануга тапшыру планлаштырыла, проектка инвестицияләр күләме – 1 млрд сумнан артык.