Татарстан Республикасының инвестицион дайджесты: Түбән Кама районы белән «инвестицион сәгать»
Татарстан Республикасы Түбән Кама муниципаль районы Рөстәм Миңнеханов рәислегендә узган республика киңәшмәсе кысаларында тотрыклы социаль-икътисадый үсешне тәэмин итү чараларын гамәлгә ашыру турында хәбәр итте.
Мондый киңәшмәләр атна саен республика Хөкүмәте йортында уза. Район башлыгы докладында район эшчәнлегенең төп күрсәткечләре, тармакларны үстерү, эшмәкәрлек торышы, хезмәт хакы һәм эшсезлек дәрәҗәсе, социаль инфраструктура һәм торак төзелеше темплары, мәгариф, төрле өлкәләрдә казанышлар карала.
Түбән Кама районы башлыгы, Түбән Кама шәһәре мэры Рамил Муллин район эшчәнлегенең төп күрсәткече булып тулаем территориаль продукт күләме тора дип сөйләде. 2022 елда районның тулаем эчке продукт 388 млрд сум тәшкил иткән, бу узган елга карата 115% тәшкил иткән. 2023 елга фараз - 397 млрд сум.
Рамил Муллин сүзләренчә, район эшендә өстенлекле юнәлешләр булып кеше капиталына инвестицияләр, инвестицион климатны яхшырту һәм яшәү өчен уңайлы шартлар формалаштыру тора.
Түбән Кама төп капиталга инвестицияләр күләме буенча лидерлык позицияләрен саклап кала. 2022 ел нәтиҗәләре буенча инвестицияләр күләме 132 млрд сум тәшкил итте, агымдагы ел фаразы - 136 млрд сум.
Районда берничә мөһим эре инвестиция проектларын гамәлгә ашыру дәвам итә, мәсәлән:
- «Түбән Кама Нефтехим» - Сибур ААҖ олефиннар җитештерү комплексы.
- ЦМК шин җитештерүне елына 2,8 млн данәгә кадәр арттыру.
- Эре габаритлы шиннар һәм велошиннар җитештерүне оештыру.
- «ТАНЕКО» Комплексы җитештерүләрен үстерү һәм киңәйтү.
- Нефть продуктларын «ТАИФ-НК»да эшкәртү.
Нефть-газ химиясе кластерын алга таба үстерү, шулай ук икътисадны диверсификацияләү Алабуга «Этилен 600» индустриаль паркы белән бәйле, ул безнең эре компанияләр җитештергән чимал базасында югары технологияле продукция җитештерүче урта һәм кече предприятиеләр хисабына формалашачак.
Үз производстволарын эшмәкәрләр, шул исәптән «Түбән Кама» АСИҮТ резидентлары, сәнәгать һәм индустриаль парк территорияләрендә урнаштыралар. Түбән Кама районында шундый 6 мәйданчык эшли.
Әлеге юнәлештә «Түбән Кама» муниципаль паркы локомотив булып тора, анда үсешнең 1нче һәм 2нче этаплары кысаларында төрле тармаклардан 16 компания-резидент җәлеп ителде. 7 предприятие инде үз җитештерүләрен башлап җибәргән.
Күптән түгел Татарстан Республикасының Инвестиция советында «Татарстан Республикасы Түбән Кама муниципаль районы территориясендә «Түбән Кама» сәнәгать паркының III чиратын булдыру» проекты каралды. Хәзерге вакытта инде 10 компания үз производстволарын сәнәгать паркының 3 нче этабы территориясендә урнаштыру өчен гариза биргән.
Уңышлы инвестиция проектының мисалы булып «Түбән Кама термалары» сәламәтләндерү комплексы тора. Хәзер инвестор проектның алга таба үсешен карый – бу кунакханә комплексы төзү һәм медицина өлкәсендә хезмәтләр күрсәтү.