Талия Миңнуллина Ислам Хезмәттәшлеге Оешмасы Генераль секретаре белән сөйләшүләр үткәрде
Хөсәен Ибраһим Тәха кичә Татарстанга Татарстан Республикасы Рәисе, «Россия – Ислам дөньясы» Стратегик караш төркеме рәисе Рөстәм Миңнеханов чакыруы буенча килде. Бүген иртән ул Татарстан Республикасының инвестицион үсеш агентлыгында булды. Аны Татарстанның икътисадый һәм инвестицион потенциалы белән Агентлык җитәкчесе Талия Миңнуллина таныштырды. Югары дәрәҗәле кунак һәм аны озатып йөрүче делегация ТР ИҮА Бердәм презентация үзәгендә булганнан соң, ул Татарстан вәкилләре, атап әйткәндә, Талия Миңнуллина һәм Татарстан Республикасы Дәүләт Советы Рәисе Фәрит Мөхәммәтшин белән сөйләшүләрдә катнашты. Очрашу барышында яклар республиканың Ислам хезмәттәшлеге оешмасы белән хезмәттәшлеген алга таба ныгыту һәм үстерү буенча планнар билгеләделәр.
Талия Миңнуллина: "Ислам Хезмәттәшлеге Оешмасы (ИХО) дөньяда алдынгы ислам берләшмәсе булып тора, 57 илне үз эченә ала, алар арасында Төркия, Иран, Согуд Гарәбстаны һәм Берләшкән Гарәп Әмирлекләре бар. Россия оешмада күзәтүче статусында тора. «Россия – Ислам дөньясы: KazanForum» XVII Халыкара икътисадый форумы 2026 елга Казанның киләсе елда ислам дөньясының мәдәни башкаласы булуына багышланган чаралар программасына керде. 2025 елда KazanForum кысаларында Татарстан башкаласы беренче тапкыр Ислам Хезмәттәшлеге Оешмасы илләренең Мәдәният министрлары съездын кабул итәчәк. Казан 2026 елда Ислам дөньясының мәдәни башкаласы булачак дигән карарны 13 февральдә Согуд Гарәбстанында узган ИХО илләре мәдәният министрларының XIII конференциясендә кабул иттеләр".
Хөсәен Ибраһим Тәха очрашу азагында кабул итүче якка мондый нәтиҗәле киңәшмә өчен рәхмәт белдерде: "Без әле үзебез өчен республиканы һәм форумны ачып кына җибәрәбез. Ләкин төгәл әйтә алам, без алга таба сезнең белән уртак тырышлык белән эшләячәкбез, сезнең эшегезне җиңеләйтү өчен күрешәчәкбез. Хәзер бергә эшлибез!"
Визиты барышында югары дәрәҗәле кунак шулай ук Болгар дәүләт тарих-архитектура музей-тыюлыгында, Болгар ислам академиясендә һәм Казан Кремлендә булырга ниятли.
Белешмә:
2024 елда Татарстанның ИХО дәүләтләре белән товар әйләнеше 38% ка арткан һәм 7,9 млрд доллар тәшкил иткән. Мисыр, Малайзия, Берләшкән Гарәп Әмирлекләре, Тунис, Төркия, Урта Азия дәүләтләре белән тыгыз сәүдә-икътисадый мөнәсәбәтләр урнашкан. Азия Һәм Африка илләре партнерлары белән элемтәләр тотрыклы рәвештә ныгый. Ислам Хезмәттәшлеге Оешмасы илләренең республиканың гомуми тышкы сәүдә товар әйләнешеннән өлеше 50% ка якынлаша.
