Төркия МИЗы Татарстанга инвесторларны җәлеп итәргә әзер
Гебзе (Төркия) сәнәгый зонасының топ-менеджменты Татарстанга инвесторларны җәлеп итергә әзер. Моның турында бүген Гебзе Оештырылган сәнәгый зонасы идарәсенең рәисе Вахит Йылдырым Татарстан Республикасына эшлекле визиты барышында белдерде. Визитны Татарстан Республикасының инвестицион үсеш агентлыгы әзерләде.
Казан Кремлендә Төркия делегациясен Татарстан Республикасының Президенты Рөстәм Миңнеханов каршы алды. ТР ИҮА җитәкчесе Талия Миңнуллина катнашкан очрашу барышында Татарстан һәм Төркия инвестицион инфраструктура объектларының аралашу перспективалары һәм механизмнары каралды.
Төркия сәнәгый зоналарының уңышлары 2030 махсус программа кысаларында план буенча үсеш белән бәйле дип Вахит Йылдырым билгеләде. Аның сүзләре буенча, Төркия Республикасында сәнәгый зоналар саны һәрвакыт үсә, буш мәйданнар калмады диярлек. Төркия ОИЗ җитәкчесе алар Төркия һәм чит ил инвесторларны җәлеп итергә әзер дип ассызыклады. “Безнең сәнәгый зоналар сайтына 35-37 мең кеше керә, аларның 40% Германиядән”, - дип Йылдырым әфәнде әйтте.
“Төркия стратегиясе башка илләргә инвестицияләүдән генә түгел, әмма үз “үсеш нокталарын” булдырудан тора. Шунда әлеге өлкәдә зур тәҗрибә тупланды. Илнең “индустриаль йөрәгендә” - Коджаэли провинциясендә урнашкан Гебзе сәнәгый мәйданының эш оештыру системасы төп карарларны, шулай ук мәйдан белән идарә итү буенча, резидентлар үзләре ясыйлар”, - дип ТР ИҮА җитәкчесе Талия Миңнуллина билгели.
“Визит барышында без Татарстанның инвестицион инфраструктура объектларына Гебзе идарә компаниясен җәлеп итү һәм яңа сәнәгый мәйданны булдыру буенча мәсьәләсен өйрәнәбез. Мөмкин булган вариантлар арасында безнең республикада сәнәгый зона филиалын ачу, яңа юридик шәхесне теркәү бар”, - дип Талия Миңнуллина ассызыклады.
Өч көнлек визит барышында делегация очрашулар үткәрә һәм Татарстанның инвестицион инфраструктура объектларын карый, алар арасында “Чистай”, “Алабуга”, “Химград”, Зөя регионара мультимодаль логистика үзәге бар.
Элек Төркия Республикасына визит (14-15 октябрь) барышында Коджаэли провинциясе – Төркиянең сәнәгый үзәгенең эшлекле даирәләренә Татарстанның инвестицион потенциалы презентациясе үтте, “Match4Industry Business Matching Event” Халыкара конференциясе кысаларында очрашулар узды. Татарстан вәкилләре Гебзе муниципалитетында GOSB Оештырылган сәнәгый зонасы эше белән таныштылар.
ТР ИҮА Матбугат хезмәте
Белешмә
“Гебзе” махсус сәнәгый зона (GOSB) Гебзе провинциясендә 537 га мәйданында Коджаэли һәм Стамбул шәһәрләре арасындагы чиктә урнашкан. Ул 1986 елда барлыкка килде. Хәзерге вакытта GOSBта 156 компания эшли, аларның 42 чит ил компанияләре булып тора. Хезмәткәрләр саны – 22 мең кеше.
GOSB – кредитны кулланмыйча тулысынча инвесторлар керткән акчага эшләүче Төркиядә һәм дөньяда беренче һәм иң тиз үсүче сәнәгый зона. Зонаның эшханәләр экспорты 1 миллиардтан артык доллар тәшкил итә, инвестицияләр күләме – 1,35 млрд. доллар.
Зона резидентларының эшчәнлек өлкәләре: машина төзелеше, автокомпонентларны җитештерү, IT өлкә, азык-төлек продуктларын җитештерү, пластмасса, электрик җиһазлар, электроника җитештерү һ.б.
GOSBта Германия, Австрия, АКШ, Дания, Финляндия, Франция, Голландия, Англия, Швеция, Швейцария, Италия, Израиль, Япония, Люксембург һәм Кореядән компанияләр эшли.
Зона үз резидентларына төрле хезмәт күрсәтә, анда лицензияләр һәм рөхсәтләр керә: зоналаштыру, төзелешкә рөхсәт, агып җыелучы суларны чистарту һәм пожар куркынычсызлыгы буенча сертификатлар, эш лицензияләре һәм башкалар.
Зона территориясендә технопарк, банклар, мәктәп, сәнгать галереясы, күргәзмә һәм рекреацион үзәкләре урнашкан.