Африка һәм Россия: Марокко аша элемтә
15 сентябрьдә Мароккода Агадир шәһәрендә «Россия-Марокко: эффектив икътисадый партнерлык» Россия-Марокко эшлекле форумы старт алды. Чарада ике дәүләтнең эшлекле даирәләренең 300дән артык бизнес вәкиле катнашты. Татарстанның инвестицион үсеш агентлыгы җитәкчесе Талия Миңнуллина форумга Татарстан Республикасының вәкиле булып килде.
Форумда Марокко Корольлегендәге РФ Гадәттән тыш һәм Тулы вәкаләтле Илчесе Валерий Воробьев, РФ Сәнәгать һәм сәүдә министрының урынбасары статс-сәркатип Виктор Евтухов, Марокко Корольлегенең икътисад һәм финанс министры Мөхәммәд Буссаид, Марокко Корольлегенең авыл хуҗалыгы һәм диңгез балыкчылыгы министры Азиз Аккханнуш, Марокко оешмаларының Генераль берләшмәсе (CGEM) Президенты Мирием Бенсалах-Шакрун, Россия-Гарәп Эшлекле Киңәшмә Рәисе Владимир Евтушенков һәм башка зур урындагы кунаклар булды.
Чара Марокконың тышкы сәүдә Министрлыгы һәм Марокко оешмаларының Генераль берләшмәсе (CGEM) эгидасы астында Россия Федерациясенең ЧЭМ, Марокко Корольлегенең ЧЭМ, Россия Федерациясенең Икътисадый үсеш министрлыгы, Россия һәм Марокко вәкиллекләре һәм сәүдә-сәнәгать палаталары, шулай ук Россия-Гарәп Эшлекле Киңәшмә ярдәме белән үткәрелә.
Чара барышында форум катнашучылары Россия-Марокко сәүдә-икътисадый хезмәттәшлегенең заманча программасы мәсьәләләренең зур даирәсе турында фикер алыштылар, илнең сәүдә-икътисади потенциалы белән таныштылар, Россия компанияләренең мөмкинлекләрен күрсәттеләр. Форум программасы пленар утырышлар, хезмәттәшлекнең төп юнәлешләре буенча секцияләр, ике яклы килешүләр һәм меморандумнарга кул кую церемониясе, Россия һәм Марокко эшмәкәрләренең В2В очрашуларын үз эченә алды.
Чара оештыручылар барлык форум катнашучыларына бу илдә үз-үзеңне тоту кагыйдәләре белән белешмәлекләрне таратып чыктылар. Мәсәлән, башка дин тотучыларга мәчеткә керү катгый тыела. Мароккода кемне дә булса аның рөхсәтеннән башка карточкага төшерергә ярамый, чөнки кайбер дингә ышанучылар фотографиянең җанның бер өлешен урлаганына ышаналар. Чәйгә чакырудан, шулай ук икенче, өченче чәй чынаягыннан баш тарту кабул ителмәгән, хәтта сезнең эчәсегез килмәсә дә. Марокко короле яисә регионы турында сүз башларга һич кенә дә ярамый. Корольлектә уң кул белән генә ашау кабул ителгән. Сезнең белән сөйләшә торган Марокко кешесе кулыгызга тотынса, шул вакытта оялу тыела, чөнки бу ил халкы өчен бу дуслык билгесе.
Форумның беренче көнендә «Марокко-Россия: стратегик партнерлыкның икътисади мөмкинлекләре» темасына пленар утырыш узды, аның барышында Талия Миңнуллина заманча Татарстанны күрсәтте, республиканың махсус икътисадый зоналары, сәнәгать парклары, узып китүче үсеш территорияләре һәм булган инвестицион проектлар турында сөйләде. Татарстанның иң яшь сәясәтчесенең сүзләре буенча, «Россиянең актив регионнарында, әлбәттә Татарстаннан башлап, проектларны тормышка ашыру аша Марокко Корольлеге белән Россия Федерациясе арасында озак вакытлы партнерлык мөнәсәбәтләрен урнаштыру бердәм хезмәттәшлек үсешенең төп факторына әйләнергә мөмкин».
Шулай ук форум катнашучылары балыкчылык, авыл хуҗалыгы, туризм, банк эше, финанс һәм яңарып торучы энергия чыганаклары кебек секторларда хезмәттәшлек буенча сөйләшүләр узган түгәрәк өстәлләрдә катнаштылар.
«2013 елда Марокко Африка континентында Россиянең беренче рәсми партнерына әйләнде. Хәзерге вакытта безнең илләр арасында товар әйләнешенең артуында уңай тенденцияне күрергә мөмкин. – дип билгеләде Талия Миңнуллина. – Әлеге визит барышында безнең яңа элемтәләр барлыкка килде һәм инде киләсе атнада без Татарстанда Мароккодан килгән бизнес-кунакларны кабул итәчәкбез».
Эшлекле форум кысаларында Татарстанның инвестицион үсеш агентлыгы җитәкчесе Мароккодан килгән делегацияне уздырылуы 2017 елның маена планлаштырылган 9 “Россия - Ислам дөньясы: Kazansummit 2017” Халыкара икътисади саммитында катнашырга чакырды. Саммит Россия һәм Ислам хезмәттәшлеге оешмасы (ИХО) илләренең икътисадый аралашуының төп мәйданы булып тора. Аерым алганда, Саммит 2017 кырларында «Россия-Марокко» юнәлеше буенча ике яклы хезмәттәшлекнең эшлекле программасы турында фикер алышу узачак.
Безнең илләрнең хезмәттәшлеге турында сөйләгәндә, 2015 елның башыннан алып 2016 елның башына кадәр Мароккодан Россиягә цитруслар экспортының гына 20%ка – 200 мең тоннага кадәр артуын өстәргә кирәк. Марокко, Төркия (500 мең тонна) һәм Мисырдан (240 мең тонна) гына калышып, зурлыгы буенча өченче Россияне цитруслар белән тәэмин итүче булды. Икътисад министрлыгының мәгълүматлары буенча, гомумән алганда 2015 – 2016 елның башы эчендә Марокко 1,6 млрд. дирһәмгә (10,57 млрд. сумга) Россиягә 314 мең тонна җиләк-җимеш һәм яшелчәләр җибәрде, бу 2014 – 2015 елларның шушы вакытына караганда 24%ка артыграк. Моннан тыш, Россия ашлыгы, Европа тәэмин итүчеләрен кысып, актив рәвештә Марокко базарына җибәрелә. Шулай, Марокконы тәэмин итү быел нуль күрсәткечләрдән 200 мең тоннага кадәр күтәрелде. Шулай ук Марокко Россиядә җитештерелгән граждан самолетларын сатып алырга планлаштыра. Ике ил арасында иң перспектив юнәлешләргә агросәнәгать, кояш энергиясен куллануга нигезләнгән технологияләр, цифрлы технологияләр һәм туризм кертелде.
Узган елда Марокко Корольлегенең тышкы сәүдә министры Мөхәммәд Аббуның Татарстан Республикасына визит ясаганын искә төшерик, анда ул Татарстанның Президенты Рөстәм Миңнеханов һәм Республиканың инвестицион үсеш агентлыгы җитәкчесе Талия Миңнуллина белән очрашты. Очрашу барышында яклар АСК, машина төзелеше, югары технологияләр һәм башка өлкәләрдә бердәм хезмәттәшлек турында фикер алыштылар. Мөхәммәд Аббу әңгәмә барышында Марокко Корольлегенең Россиянең әйдәп баручы регионнарының берсе буларак Татарстан белән ике яклы хезмәттәшлекне тирәнәйтергә кызыксынуын белдерде.
Безгә социаль челтәрләрдә кушылыгыз, яңалыклар һәм эксклюзив материалларны күзәтеп барыгыз:
