Рөстәм Миңнеханов: «Чаллы - әһәмияте буенча республикада икенче шәһәр»
Бүген Яр Чаллы шәһәрендә «Яр Чаллы шәһәре» муниципаль берәмлеге Шәһәр советы утырышы уза. Утырыш «Яр Чаллы шәһәре» муниципаль берәмлегенең 2021 елда социаль-икътисади үсеш нәтиҗәләренә һәм 2022 елга куелган бурычларга багышланган.
Чара башланганчы, республика Президенты Рөстәм Миңнеханов җитәкчелегендәге Татарстан Хөкүмәте делегациясе, Чаллы мэры Наил Мәһдиев һәм «КАМАЗ» ГАҖ генераль директоры белән бергә, КамАЗның җитештерү мәйданчыкларында булды. Аннары шәһәр балалар һәм яшьләр иҗаты сарае фойесында алар Чаллы предприятиеләре продукциясе, товарлары һәм хезмәт күрсәтүләре күргәзмәсен карадылар. Инновацион эшләнмәләр, технологияләр һәм казанышларны 20дән артык предприятие һәм оешма тәкъдим итте. Проектларның күбесе - цифрлаштыру өлкәсендә.
Татарстан Президентына продуктларга заказ бирү функциясе булган Haier суыткычын да күрсәттеләр. «Яр Чаллы» АСИҮТ резиденты Haier компаниясе шундый суыткычларны җитештерүне эшләтеп җибәрүгә әзерләнә. Өч модель чыгару планлаштырыла. Күргәзмәдә акыллы суыткыч тәкъдим ителде, аның ярдәмендә супермаркетларның берсендә азык-төлеккә заказ бирергә мөмкин.
ТР Хөкүмәте делегациясе визитының төп өлеше шәһәр Советы утырышы булды. Йомгаклау ясаганда, Чаллы мэры Наил Мәһдиев эшлекле һәм инвестицион активлыкны арттыруның мөһим резервы - эшмәкәрлеккә ярдәм итү инфраструктурасы, дип билгеләп үтте. Шул максат белән шәһәр үзенең югары нәтиҗәлелеген күрсәтүче сәнәгать паркларын үстерүне дәвам итә. Алар хәзер 12.
2021 ел нәтиҗәләре буенча резидентлар саны 358. Хезмәткәрләр саны 7% ка арткан, керем күләме - 63% ка. Бюджетларның барлык дәрәҗәләренә 23 млрд сум тирәсе салым түләнгән.
«Безнең шәһәрдә сәнәгать парклары территориясендә үз производстволарын ачарга теләгән предприятиеләрнең безгә мөрәҗәгатьләре арту күзәтелә. Бу яхшы тенденция», - диде Наил Мәһдиев. 10 потенциаль резидент «Үсеш» сәнәгать паркында үз производстволарын ачарга планлаштыра. Шул ук вакытта паркның 1 һәм 2 чираты тулысынча мәшгуль.
Татарстан Республикасы Президенты Рөстәм Миңнеханов билгеләп үткәнчә, автошәһәр республикада икенче урында тора, территориаль яктан гына түгел. Татарстан Республикасы казанышлары рейтингында Яр Чаллы төзелеш, төяп җибәрелгән продукция күләме буенча икенче урында тора. Дүртенче урында - «КАМАЗ», «Даймлер», «Риат», «Кнорр-бремзе» һәм башка эре предприятиеләрнең актив эше нәтиҗәсендә үзебез җитештергән товарлар китерү күләме буенча.
Рөстәм Миңнеханов билгеләп үткәнчә, «Яр Чаллы» АСИҮТ - Россия территорияләренең алга киткән үсеш флагманы, үсеш өчен яңа мөмкинлекләр табарга кирәк.
“Кече бизнесның тулаем территориаль продукты өлеше хәзер 34,7 процент тәшкил итә, әгәр АСИҮТ актив эшләсә, процент югарырак булачак”, - дип билгеләп үтте ул.
Татарстан Президенты билгеләп үткәнчә, хәзерге вакытта республикада бик күп программалар гамәлгә ашырыла. Шулай итеп, М12 юллары, Түбән Кама һәм Яр Чаллыны урап уза торган юллар, Кама, Шәле-Баулы аша күпер төзелә. «Республика тарихында мондый кыйммәтле объектлар беркайчан да төзелмәде, барлык проектлар да гамәлгә ашырылыр дип ышанам».
Чаллы мәгълүмат сәясәте һәм җәмәгатьчелек белән элемтә идарәсе материаллары буенча