Инвесторлар шәһәре
"Яр Чаллы республика үсешенә зур өлеш кертә", - дип белдерде Татарстан Рәисе Рөстәм Миңнеханов шәһәр Советы утырышында. Чарада ТР ИҮА җитәкчесе урынбасары Марина Епифанцева катнашты. Шәһәр икътисадының торышы җәлеп ителгән инвестицияләр күләмен характерлый, ул ел йомгаклары буенча 91,5 млрд сум күләмендә бәяләнә. Шунысы мөһим, соңгы елларда бу күрсәткечнең үсеш динамикасы күзәтелә. Бу мәсьәләдә, шәһәр мэры Наил Мәһдиев билгеләп үткәнчә, шәһәр Татарстан Республикасының инвестицион үсеш агентлыгы белән берлектә актив эшли.
Шәһәр икътисадына алгарышлы үсеш территориясе (АҮТ) резидентлары сизелерлек өлеш кертә. Бүгенге көндә алар – 50. Резидентларның капиталь кертемнәре 39 млрд сум тәшкил итте. 10 692 яңа эш урыны булдырылды. Барлык төп күрсәткечләр буенча 2023 елга карата 14% тан 37% ка кадәр үсеш күзәтелә. 2024 елда тагын алты яңа резидент теркәлгән. Инвестицияләр суммасы 2,3 млрд сум тәшкил иткән. АҮТ резидентлары тарафыннан барлык дәрәҗәдәге бюджетларга түләнгән салымнар суммасы бирелгән преференцияләр суммасыннан 2,4 мәртәбә артыграк.
«Хайер» индустриаль паркында су җылыткычлар җитештерү буенча завод ачылу мөһим вакыйга булды, анда дөнья дәрәҗәсендәге иң заманча технологияләр кертелгән. Компания тарафыннан барлыгы 7 объект, шул исәптән 6 завод һәм 900 урынлык тулай торак төзелгән. Шәһәр икътисадына 35 млрд сум инвестиция кертелгән. Гамәлдәге резидентларның үзләренең алдан планлаштырылган күрсәткечләрен арттыруы, продукциянең яңа төрләрен кертүе һәм өстәмә эш урыннары булдыруы да мөһим. 2024 елга барлык план күрсәткечләре тулысынча үтәлгән. Болар барысы да Яр Чаллы шәһәрендә уңайлы инвестицион климат булдырылуы турында сөйли. Әйтик, яңа производстволар санының артуы шәһәр буенча төяп җибәрелгән продукция күләмендә резидентлар өлеше уңай динамикага китерә. 2016 елдан ул 16% ка кадәр диярлек үсте.
Яр Чаллы шәһәренә гамәлдәге резидентларны озату һәм яңа инвестицияләр җәлеп итү буенча уртак эш, һичшиксез, дәвам итәчәк. Чаллы шәһәре белән "муниципаль сәгать"не Вконтактедагы безнең төркемдәге сылтама буенча карагыз. vkvideo.ru/video-211407548_4562...